خطوات صغيرة

الأربعاء، 17 فبراير 2016

ينفع اعلم نفسى طريقة مونتيسورى عشان اطبقها مع اولادى ؟؟؟

ينفع اعلم نفسى نهج المونتيسورى و اطبقه بنجاح مع ابنى ؟؟؟
اه ينفع اوى كمان
طب ازاى؟؟؟

انا مش هدفى اشرح نهج المونتيسورى
امال هدفى ايه؟؟؟

هدفى انك تبقى قوية و واثقة فى نفسك و فى قدراتك انك تقدرى تدى لابنك جودة تعليم عالية 

هدفى ان مافيش حاجة توقفك عن تحقيق حلمك 

لا فلوس و لا مصادر 

هه تحمستى و لا لسة ؟؟
حسيتى انك تقدرى و لا لسة مش واثقة فى نفسك ؟؟

جددى النية و استعينى بالله و تعالى اقولك تعملى ايه....

بس خلى نيتك لله و حطى فى بالك ده كويس عشان الطريق فيه صعوبات و ممكن همتك تقل او تحبطى و النية المظبوطة و الاستعانة بالله هى بس اللى هتقومك تانى

طيب نعمل ايه ؟؟؟
انت محتاجة ايه عشان تطبقى نهج المونتيسورى بالذات للمرحلة من 3 ل 6؟؟

1-الفلسفة
2-قائمة بالانشطة
3-شرح الانشطة
4-الادوات

لو لسة مقرأتيش التدوينات دى يبقى اقرايها الاول عشان فيها كلام مهم مش هكرره هنا



طب محتاجين ايه عشان نبدا ؟؟

ارادة
+
جهاز كمبيوتر
+
معرفة جيدة باللغة الانجليزية و طبعا ممكن تستعينى بمترجم الكترونى
+
وقت و معنويات مرتفعة



1-الفلسفة

فى 3 طرق بس ابدأى من الاسهل للاصعب

اولا : Theory album

يعنى ايه ؟؟

ده ملخص الفلسفة بطريقة تفيدك فى التطبيق المباشر

و ده مصدر مجانى له


ثانيا: كتب عن المونتيسورى لم تكتبها ماريا مونتيسورى 


و ده بيشرح ال8 مبادئ القائم عليها النظام و الابحاث العلمية اللى بتثبت صحة المبادئ دى
ممكن تقرأى ملخص كل فصل لو مستعجلة


و ده هدفه انه يعرف معلمين الطفولة المبكرة بفلسفة مونتيسورى و ازاى ممكن يستفيدوا منها فى شغلهم
مجمع الموضوع بشكل ممتاز و اسلوبه سهل و مش كبير اوى


الكتاب ده محتاج تكونى عندك المام بالفلسفة و الانشطة بس مش عارفة تتخيلى الامور بتمشى ازاى فى الفصل و المعلمة بتتعامل ازاى فى المواقف المختلفة
الكتاب مذكرات معلمة مونتيسورى خلال عام كامل و ازاى اتعاملت مع انماط الاطفال المختلفة و منهم اطفال بيعانوا من صعوبات تعلم

و طبعا فى كتب تانية كتير بس معنديش عنهم تفاصيل بس تقدروا تعرفوا عن طريق ال review اللى بيكون موجود تحت رابط شراء الكتاب على امازون



ثالثا: كتب ماريا مونتيسورى

تقدرى تلاقيها على الموقعين دول


بس مش كل كتبها متوفرها لكن اغلبها و انا شخصيا مقرأتهومش بس فى مجموعة عالفيس بوك ممكن تساعدكم تبداوا فى كتابات ماريا مونتيسورى


المجموعة دى عاملين study group لمدة عام باستخام 3 كتب لماريا مونتيسورى
-العقل الممتص
-سر الطفولة
-اكتشاف الطفل

و ممكن طبعا شراء الكتب المترجمة من (دار الكلمة )


2-قائمة بالأنشطة

لقيت افضل مصدر شامل ليها الموقع ده
فيه قائمة بالانشطة من 0 ل 12 سنة

و الرابط ده فيه ترتيب الانشطة مقسمة على 8 فترات للامهات اللى كانت بتسال تبدأ بايه


3-شرح الانشطة
و ده عن طريق كتابة اسم النشاط على اليوتيوب او استخدام الالبومات 
Monntessori albums

و دى قائمة مقارنة جميع الالبومات المتوفرة على الشبكة سواء مجانية ام لا


و دى مصادر بالعربى


و من افضل المصادر لنهج المونتيسورى فى اللغة هو هذا الكتاب


ملحوظة : التحميل من هذا الموقع يكون مقابل رفع ملف اخر على الموقع

4-الادوات

و دى بقى نقطة مسببة مشكلة لامهات كتيير

بصى الموضوع محتاج يا اما وقت يا اما فلوس

و انا بالنسبالى مجبتش و لا اداة من الادوات الاصلية 

و على فكرة مفيش و لا اداة لا يمكن صناعتها منزليا و بخامات بسيطة بما فيها الاسطوانات ذات المقبض (ممكن صناعته بالكرتون السميك اذا عرفتى المقاسات )
و حتى ال binomial & trinomial cube

اكيد الادوات مش هتكون بقوة الادوات الخشب الجاهزة بس مع التنبيه على الاطفال بالحرص فى الاستعمال و تغليفها بالشريط اللاصق هتنفع و هتدأى الغرض 

فمتخليش نقطة الادوات و تكلفتها توقفك

و طبعا ممكن بابداعك تستخدمى بدائل تؤدى نفس الهدف التعليمى

طيب عايزة اعرف اجيب طريقة صناعة الادوات منزليا ازاى ؟؟

هنستخدم كلمات البحث الاتية :

diy montessori materials
montessori materials templates
montessori printables

او كتابة اسم الاداة لو بتدورى على اداة معينة

نقطة كمان ....غير الانشطة الاصلية فى حاجة اسمها انشطة مستوحاة من مونتيسورى 
montessori inspired activities

ابحثى بالاسم ده و اختارى اللى يعجبك

لحد هنا انتهت التدوينة و حاولت اجمع فيها معظم الحاجات اللى هترشدكوا على طريق المونتيسورى 

و كلمة أخيرة....ملكيييييش دعوة بحد...انت عندك هدف عايزة تحققيه و هو ده بس اللى تركزى فيه و تحطى فيه مجهودك كله....متخليش مجهودك يضيع فى مقارنات و حسرة...هتوصلى ان شاء الله...ان الله مع الصابرين :)

دمتم سالمين :)












الأربعاء، 5 أغسطس 2015

مصادر للتطبيق العملى لمنتسورى فى المنزل

السلام عليكم 

 النهاردة جايبالكم 3 مصادر للتطبيق العملى لطريقة منتسورى فالبيت

الاول للاطفال حتى عمر سنتين


Montessori for infant and toddler
الكاتبة ليزا نولان 
الكتاب كان فى الاصل كتابين كيندل و ضموهم على بعض
الاول فيه مراحل تطور الطفل فى اول سنتين و 50 نشاط منتسورى مقسم بالمجالات
التانى الاسئلة المتكررة فيما يخص تطبيق الانشطة و الاسئلة الاخرى خاصة 
بالعناية بالطفل

للتحميل

الكتاب الجاى ده ممتاز...طريقة عرضه بسيطة و صوره كتير و جميل للمرحلة اقل من 3 سنوات ...اسمه
How to raise an amazing child the montessori way 
للتحميل

هنا



الكتابين التانيين للمرحلة الثانية من3 ل 6 سنوات

Teaching Montessori the preschool years
(الكاتبة مكنش عندها فصل منتسورى مجهز بادوات غالية و كان مجرد ركن فى غرفة فى المنزل استخدمته لتعليم بناتها الاتنين بفلسفة منتسورى )

للتحميل


Teach me do it myself

الكتاب رائع و الميزة كمان عن الكتاب الاول وجود قسم للانشطة العلمية و اسلوب العرض جذاب :)

للتحميل

الانشطة فى المصدرين دول مش محتاجة ادوات منتسورى مخصوصة و تطبيقها سهل و فى فى اخر كل كتاب ورق للطباعة لصناعة نسخة منزلية من بعض ادوات منتسورى فى صورة مبسطة

يا رب يفيدوكم

دمتم سالمين :)

الثلاثاء، 4 أغسطس 2015

مصادر لمنهج العلوم لما قبل المدرسة

السلام عليكم

بعد غياب فترة طويلة رجعتلكم بهدية جميلة خااالص

مصدرين لمنهج العلوم لمرحلة ما قبل المدرسة و رياض الاطفال

الاول نشرته قبل كده على التعليم المرن و هنشره تانى

ده الموقع 

و ده كل اللى على الموقع من تجارب فى ملف وورد للى حابب يطبعه


المصدر التانى و هو مشهور فى الخارج فى وسط التعليم المنزلى كمصدر لمنهج العلوم فى المرحلة دى

الكتاب هو 

Bubbles,rainbow and worms

و ده رابط التحميل


التجارب اللى فالمصدرين ادواتها متوفرة جدا جدا و ممكن فى تجارب متحتاجوش تشترولها حاجات مخصوصة

يا رب يفيدوكم

بناءا على طلب الامهات لمصادر عربية

المصادر اللى اعرفها للعلوم بالعربى مش مخصصة لمرحلة الروضة و ما قبل المدرسة و لكن ممكن الاستفادة منها

ده كتاب 100 تجربة علمية و رابط التحميل

هنا

فى 100 تجربة علمية مشروحة بطريقة جميلة جدا بس مش لسن معين فممكن تختارا اللى يناسب عمر اولادكم

المصادر التانية اللى ممكن تفيدكم هو منهج العلوم فى الصف الاول الابتدائى للكويت و السعودية ..اعتقد ممكن نستخدمه لمرحلة الروضة

للتحميل

رابط منهج السعودية للصف الاول ترم اول
رابط منهج السعوية للصف الاول ترم ثانى
منهج الكويت للعلوم الصف الاول

اسالكم الدعاء لى بظهر الغيب بتيسير الحال

دمنتم سالمين :)

الجمعة، 8 مايو 2015

منهج التقوى او (Taqwa Curriculum) تفتكروا ممكن نطبق الفكرة دى فى مناهجنا ؟؟


السلام عليكم 
الموقع ده اسمه منهج التقوى او Taqwa curriculum
فكرته جميلة جدا و هى اسلمة المنهج البريطانى
المرحلة اللى انتهوا منها لحد دلوقتى مرحلة من 4 ل 6 سنوات و عرضين الكتاب للبيع على الموقع و فى منه عينة pdf عارضة مثالين او 3 للموضوع ده
فكرتهم ان كل درس له هدف اسلامى و هدف اكاديمى و حاطين انشطة لتثبيت الاهداف دى 

مثال لكدة درس عن انواع اطعام الصحى 
TOPIC TITLE: MYSELF : FOOD AND HEALTH
Islamic Objective: Children should appreciate that sustenance (rizk) comes only from Allah and that Allah created our bodies and it is our duty to take care of our bodies in the right way.
Academic Objective: Children should be introduced to the different food groups and the vocabulary relating to healthy eating

فياريت لو نقدر نطبق الفكرة دى على اد ما نقدر فى مناهجنا عشان متبقاش التربية الاسلامية مادة منفصلة عن باقى المواد و تبقى داخلة فى كل الدروس


كتاب جميل جدا و مفيد جدا كنت مكسلة اقرأه :)



كتاب كنوز الانشطة لليونيسيف
الكتاب ده حملته عندى من فترة بس حبيت اوضح طريقة العرض عشان انا نفسى اول ما فتحته حسيته ملخبط و كسلت اقرأه بس لما ركزت شوية لقيته مفيد جدا ما شاء الله
الكتاب متقسم قسمين..انشطة تحتاج ادوات و اخرى بدون ادوات
الادوات بسيطة و متوفرة جدا زى المكعبات-الدومينو-صندوق الاشكال-صناديق متناقصة الحجم و هكذا
كل لعبة فيها شرح للاستخدام لكل مرحلة عمرية من 0 ل1 و من 1 ل3 و من 4 ل 6 و ايه اللى نتوقعه من الطفل فى كل نشاط حسب سنه
الجزء التانى انشطة بدون ادوات و اغلبها لتنمية المهارات اللغوية و الاجتماعية
للتحميل من هنا 

الاثنين، 13 أبريل 2015

جرعة تشجيع للأمهات المجتهدات :) (مع مصادر انشطة منظمة للطفولة المبكرة)

 الكلام ده موجه خصوصا للأمهات اللى عندهم ابناء فى مرحلة الطفولة المبكرة 
!!و طول الوقت بيشوفو مصادر و انشطة لامهات اخريات و بيحسو بالتقصير و ان فايتهم كتير و انهم هيضضيعو ولادهم 
ده غير المسئوليات اليومية مع وجود أطفال صغيرين بتخلى الوضع كارثى و خصوصا لو اكتر من طفل

بس على فكرة انكم وصلتم للمصادر دى فده معناه انكم مجتهدات جدا و رائعات
:)

الموضوع بسيط على فكرة و احنا اللى بنصعبها على نفسنا بالمقارنة و الوسوسة فى البحث عن مصادر

ابدأو و الموضوع بيجيب بعضه
و الحكاية مش محتاجة امكانيات فظيعة و لا ادوات غالية اطفالنا مش هيتعلموا من غيرها

في حاجات كتيرة بتعمليها بتلقائية مع طفلك تعتبر انشطة و انتى مش واخدة بالك...زى ايه؟؟

اغنية-
قصة
-peek A boo-
نسيب الطفل يزحف عالارض
-طبق و معلقة يخبط بيهم
-يسمعكم و انتو بتتكلموا
-نتكلم مع البيبى عادى-
نحطله لعبتين قدامه و نشوف هيعمل بيهم ايه-
-يتفرج علينا بنذاكر لاخواته الاكبر منه
-نبص فالمراية
-نتفرج من الشباك-
-نجرى ورا بعض
-استغماية
-نشاور عالحاجات اللى فالبيت
-نسيبه ياكل بايده و يبهدل الدنيا
-يلعب فالميه
-نحضنه شوية


كل دى حاجات بتحصل يوميا و احنا مش قاصدين نقدمها على انها نشاط بس كلها بتساعد فى نمو الطفل و تنمية مهاراته

طب تيجو نديها مسميات كبيرة شوية...
تنمية المهارات اللغوية
تنمية المهارات الحركية الصغرى
تنمية المهارات الحركية الكبرى
-تنمية المهارات الاجتماعية و العاطفية

اكيد طبعا لو ماشيين بنظام هيكون احسن بس مننساش انهم بيتعلمو طول الوقت حتى لو كان التدخل من ناحيتنا بسيط لان قدرتهم عالتعلم فى السن ده هى الاسرع على الاطلاق مقارنة بمراحل عمر الانسان الاخرى

طيب نفسنا فى مصادر منظمة ....بسيطة...

 دليل انشطة الطفل من عام ل 4 اعوام

المصادر دى منظمة جدا حسب المجال و العمر و لو عايزين تدوروا بعدها فاى مكان دوروا بس معتقدش هتلحقوا تخلصوا دول أصلا لأنهم كتير جدا و متنوعين جدا و اغلبهم مش محتاج أدوات مخصوصة و دى ميزة رائعة

و على فكرة لو عملتى نشاط واحد فى كل مجال مش هتاخدى ازيد من نص ساعة فاليوم :)

ملحوظة:الكتب الاجنبية من مدونة مكعبات و رابط الموضوع 
يحتوى على كتب اجنبية اخرى خاصة بالتعليم المنزلى و التعليم المبكر

مش لازم نقرا كل ده عشان نبدأ...لاء خالص عى فكرة
افتحو اى كتاب من دول و هاتوا القسم بتاع عمر ولادكم و اختاروا اى نشاط و ابداوا يلا

متستنوش عشان ولادكم مش هيستنوا لحد ما تعرفوا كل حاجة و بعدين تطبقوا

يا رب اكون افدتكم

دمتم سالمين :)


الاثنين، 16 مارس 2015

ازاى نبدأ تعليم منزلى ؟ المقدمة

السلام عليكم و رحمة الله

سمعت عن فكرة التعليم المنزلى من كذا مصدر و كانت فكرة جديدة بالنسبة ليا اتحمست ليها جدا بس بعد ما  
بدأت اقرأ عن الموضوع حسيت انى تايهة جدا جدا جدا 
و مش عارفة ابدأ ازاى ؟؟؟

 بعد شهور كتير من البحث وصلت لحاجة زى رؤية أو خطة للى ناوية أعمله إن شاء الله فى المرحلة العمرية من 0 ل 6 سنوات

و بعدين قلت ليه ما أشاركش الخطة دى مع الامهات التايهين اللى زىى يمكن تنفعهم يحطوا رجلهم على أول الطريق

من غير ما أطول عليكو أسيبكم مع لينكات الحلقات...

  !!الاولى :محتاسة و مش عارفة أبدأ منين
الثانية : ازاى أتأقلم مع وجود اولادى معايا طول الوقت ؟؟
الثالثة : ازاى أتعرف على قدرات أطفالى ؟؟
الرابعة : أجهز نفسى ازاى ؟؟
الخامسة : ازاى أحط خطة تعليمية و تربوية ؟؟
السادسة : ينفع أعلمه بطريقة منتسورى فالبيت ؟؟
السابعة : منتسورى من 3 ل 6
 الثامنة : لو مش عايزة منتسورى أعمل ايه؟؟ و شوية خواطر..
(ملحوظة تم اضافة بعض النقاط فى هذه الحلقة )

كده خلصت الحلقات و مش طالبة منكم غير دعوة صادقة بظهر الغيب بتيسير الحال و انى أقدر انفذ الخطة دى فعلا...

:)  دمتم سالمين

السبت، 14 مارس 2015

ازاى نبدأ تعليم منزلى ؟ 8 ( لو مش عايزة منتسورى اعمل ايه ؟؟)

السلام عليكم

وعدتكم انى هحاول احط بديل للى مش عايز طريقة منتسورى

للاسف انا مدورتش كتير فالجزئية دى عشان معظم قرائتى كانت على طريقة منتسورى

اللى هحاول اعمله هنا انى هساعدكم تدوروا ازاى لانى مش هدفى تجميع مصادر...انا  هدفى ان كل ام يكون عندها القدرة انها تدور من غير ما تستنى حد يدورلها على مصادر

اهم حاجة كلمات البحث

بس للاسف المصادر العربية فالغالب بتبدأ من مرحلة الروضة و مرحلة ما قبل المدرسة او البلاى سكول مظلومة شوية فى المحتوى العربى

هندور على كلمات زى : 
1-الاهداف التعليمية لمرحلة الروضة /رياض الاطفال
2-تخطيط وحدات الروضة
3-Preschool learning objectives
4-kindergarten learning objectives
5-kindergarten readiness check list
6-Planning preschool curriculum
7-Planning kindergarten curriculum
8-Planning preschool lessons
9-Planning kindergarten lessons
10-Preschool unit studies
11-Kindergarten unit studies
12-Free preschool curriculum
13-Free kindergarten curriculum

 و ابدا تخطيط المنهج على اساس المواد اللى هندرسها ثم البحث عن مصادر لها ثم   وضعا وفق خطة زمنية ثم تخطيط الدروس بصورة تفصيلية و اعتقد ممكن هنا الاستعانة بمعلمة رياض أطفال إن أمكن ذلك

و ممكن جدا اشتغل بمنهج عادى مش منتسورى و ادخل بعض النشاطات من طريقة منتسورى على حسب امكانية التطبيق بالنسبة لى

و ده ممكن يمشى بجانب انشطة تنمية المهارات فى منهج بورتاج و ده موجود 

او ندور عالمناهج اللى بتقدمها المدارس و ده حل سهل جدا

لحد هنا السلسلة خلصت بس ليا شوية خواطر حابة اكتبها:

- اوعو تقارنوا نفسكوا او اولادكم بحد لان كل مدرسة منزلية ليها طابع خاص و مختلف فحاولوا تشتغلوا على تطوير نفسكوا و اولادكوا بدل تضييع الوقت فى مقارنات و 
احباطات

-ابدأوا ببطء لكن بثبات...يعنى ايه؟؟ يعنى قولى هقرأ كتاب واحد بس و هحضر كورس واحد بس و خدى الموضوع بهدوء اعصاب و واحدة واحدة عشان متزهئيش و تبيعى القضية

-دى أفكارى أنا و تصورى للنفسى اعمله و مش شرط تنفع لكل الامهات...دى فقط للاسترشاد بيها و اختاروا منها اللى يتناسب معاكم ....و مع الوقت هيكون ليكم أفكاركم و قناعاتكم و هتعرفوا مع المحاولة و البحث ايه اللى ينفع معاكم و ايه مينفعش و حتى بعد البحث و لما تبتدوا تشتغلوا مع اولادكم فعلا... افكاركم هتتغير و هتكتشفوا طرق افضل ليكم و طرق مش مناسبة و مش هتستخدموها تانى

-اوعوا تدورا على مصادر بدون هدف لان ده تضييع للوقت و الطاقة و كل اللى هتكسبوه مفضلة المتصفح هتبقى مليانة جدا و الكمبيوتر كذلك هيكون مليان ملفات كتييير فاكرين انها هتنفعنا فى يوم من الايام

-الحل انكوا تمشو حسب خطة يعنى تحددوا المجالات و الاهداف و بعدين تدورولها على مصادر مش العكس

-عادى جدا جدا جدا تنبهرى بنشاط معين و تتعبى جدا عشان تعمليه لابنك و فالاخر ميعجبهوش ...ده معناه انه يا اما معندوش استعداد له دلوقتى بسبب توقيت غلط او عدم وجود المهارة اللازمة او ممكن يكون مش مناسب لطريقته فالتعلم....الخلاصة متيأسيش لحد ما تلاقى الاسلوب الصح اللى توصليله بيه المعلومة و دى ميزة التعليم المنزلى انك بتفصلى التعليم على الطفل و قدراته مش العكس

-القراءة ثم القراءة ثم القراءة و متكسلوش تقرأوا و تحضروا كورسات و تطوروا نفسكم فى مجال التربية و تعليم الاطفال بالذات طالما نويتوا تمشوا فالسكة دى لان ده هيديكوا ثقة جامدة جدا فى نفسكم تخليكوا تكملوا عن وعى و حتى لو مكانش القرار النهائى التعليم المنزلى هتكون عندكم درجة وعى عالية جدا تخليكم قادرين على تعويض النقص فى النظام المدرسى

-المرونة مهمة جدا و مش كل الامهات عندها القدرة انها هى و ابنائها يمشوا على نظام صارم...اعرفوا قدرة ابنائكم و قدرتكم على مدى الالتزام بجدول صارم عشان ميجيلكوش احباط و خليكوا واضحين مع نفسكوا و انتوا بتحطوا خطة لولادكم عشان تكون خطة واقعية و متسببش ليكم ضغط عصبى و احباط خصوصا اننا بنتعامل مع سن صغير اوى و مش سهل التحكم فى تصرفاته

-الاستعانة بالله و تجديد النية هيديكم طاقة هائلة تقدروا تكملوا بيها المشوار الطويل ده

-قراءة تجارب التعليم المنزلى هام جدا و لكن ليس للتقليد بل للاستفادة من التجارب و التشجيع

-خلوا التعليم طول الوقت و شغلوا مخ أطفالكم و انتهزوا اى فرصة تدخلولهم فيها معلومة جديدة 

-لاحظوا أطفالكم كويس عشان أول ما تلاقوا عندهم اهتمام زايد فى مجال معين او موضوع معين أمشوا معاهم فيه عشان حماسهم للحاجة دى هيزود قدرتهم على التعلم جدا و دى من طرق اختيار المواضيع فى طريقة الوحدات اللى اتكلمنا عنها الحلقة اللى فاتت (unit studies)

-اعتبروا مرحلة التعليم المبكر تجربة ليكم و لولادكم و مش لازم قرار التعليم المنزلى يكون قرار لحد المرحلة الثانوية...خلوا القرار خطوة بخطوة من غير ما تتوتروا

-متضغطوش نفسكوا زيادة بمقارنة اولادكم بزمايلهم فالمدرسة سواء علميا او اجتماعيا و كفاية عبء التعليم المنزلى نفسه عليكم

-هتقابلوا كذا نوع من الناس معارض لقرار التعليم المنزلى...يفضل و انتوا فى اول الطريق متدخلوش فى نقاش مع حد و يفضل بما ان اولادكو صغيرين فمالوش لازمة تنشروا القرار فى دايرة المعارف و الاهل و الاصدقاء لحد ما تعرفوا راسكم من رجليكم

-فى ناس هيناقشكوا بهدف التنبيه لنقطة معينة او عيب معين بطريقة موضوعية فحاولوا تاخدوا كلامهم فى الاعتبار بدون تعصب و فى الاخر طبعا الام و الاب هم اصحاب القرار مش حد تانى

-فى ناس تانية هيبقوا شايفين قراركوا تحدى واضح لاختيارهم للتعليم الخاص اللى شايفين فيه اقصى مستوى ممكن يقدموه لاولادهم و قرار التعليم المنزلى بيفكرهم ان القرار ده مش افضل حاجة بس افضل المتاح و بيفكرهم بعيوب المدارس الخاصة التعليمية و التربوية و المادية طبعا...نصيحة...متناقشوش النوع ده من  الناس 

-نوع كمان من الناس هتقابلوه هيكون مندفع و مسمعش عن الفكرة او بحث فيها و معندوش استعداد يسمع عنها التفصيل بس بيهاجم دون علم...متحاولوش تتناقشوا معاهم خالص برده لان كل محاولاتكم للاقناع فالغالب هتكون عشان انتوا لسة خايفين من القرار و مترددين و بتحاولوا تثبتوا للناس العكس...نصيحتى هى اثبتوا لنفسكم الاول انكم  قد المهمة دى بدل ما تحاولوا تثبتوا ده للناس..وجهوا مجهودكم فى الناحية الصح


-لو عندكم أطفال رضع مع وجود أطفال فى مرحلة الروضة أو البلاى سكول ...خلوهم معاكوا و انتوا بتدرسوا للطفل الاكبر لو تقدروا...دى نصيحة قرأتها من أم علمت أبنائها منزليا و بتقول انهم بيتعلموا نص اللى المفروض يتعلموه لما يكبروا فقط عن طريق وجودهم معاكى و انتى بتذاكرى لاخواتهم الكبار

-البحث فى عيوب التعليم المنزلى قبل المميزات لتلافى الحماسة الزائدة التى تؤدى لعدم   التقدير الصحيح لكل جوانب القرار و انصح بقراءة هذه التدوينة على مدونة مكعبات



 انتهت السلسلة و كل ما اتمناه هو دعوات صادقة بظهر الغيب

دمتم سالمين :)





ازاى نبدأ تعليم منزلى ؟ 7 (منتسورى من 3 ل 6 )

الحلقة دى عن كيفية وضع خطة تعليمية على طريقة منتسورى للمرحلة العمرية
(3-6)
انا غير متخصصة فى تدريس المنتسورى بس هنحاول نعرف مع بعض ازاى نتعلم الطريقة دى لوحدنا و ندورلها ازاى على مصادر و نطبقها ازاى

اولا:
 عايزين نعرف شوية مصطلحات

1-Primary Scope and Sequence
 يعنى ايه؟؟
ده جدول بكل الانشطة الموجودة فى منهج المنتسورى على حسب المرحلة العمرية
نفهم اكتر...
 عندنا 6 مجالات تقريبا فى طريقا منتسورى
الجدول ده فيه كل مجال من المجالات متقسم لعناوين اصغر و كل عنوان تحته ليسته 
بالانشطة التعليمية الخاصة به متدرجة من حيث الصعوبة و بعضها يترتب على الأخر
:و امام كل نشاط 3 خانات
تاريخ تقديم النشاط و تاريخ بدء النشاط و تاريخ اتقانه

و دول اكتر 2 لقيتهم شاملين كل حاجة بالتفصيل الممل

1
2

و فى الموقع ده كمان بس متاح اون لاين فقط بدون تحميل و بيشمل من 0 الى 12 سنة
www.montessoricompass.com

بس دى فقط ليسته بالانشطة و يبقى كيفية التطبيق؟؟؟

نيجى لتانى مصطلح:
2-Montessori albums

يعنى ايه؟؟
(يعنى بعبارة اخرى (دليل المعلم

و دول مثالين كويسين جدا له:

و كمان الكتاب ده طريقة شرحه جميلة جدا 


Teaching montessori in the home...the preschool years

هنا

و كمان كتاب Teach me do it myself

 هنا

و ده مصدر بالعربى لطريقة منتسورى بجميع الانشطة
هنا

 طيب برده هنستخدمهم ازاى؟؟
دول فيهم شرح تفصيلى خطوة بخطوة لكل نشاط فى جدول الانشطة بطريقة وافية جدا 
جدا

طب مش فاهمين برده الفكرة اوى...عندنا اليوتيوب ملياااان فيديوهات بتشرح كل نشاط نقدمه ازاى لو مش متخيلين اوى...نكتب بس اسم المجال اللى عايزين نشوف اانشطة بتاعته او لو عايزين نشاط محدد نجيب اسمه بالانجليزى من ليسته الانشطة و ندور عليه

و نخلى بالنا جدا من طريقة تقديم النشاط عشان هيعتمد عليها تقبل الطفل للنشاط من الاساس و قدرته على الفهم و الاستيعاب

نيجى بقى للتطبيق...
هنا بقى محتاجين شوية جهد
محتاجين نقرأ جدول الانشطة بصورة سريعة الاول عشان ناخد فكرة و كل ما نحب نطبق نشاط هنفتحه فى دليل المعلم او اليوتيوب و نشوف هنقدمه للطفل ازاى

طيب احنا عارفين طبعا ان منتسورى له ادوات خاصة و مكلفة جدا جدا...
انا ليا وجهة نظر متواضعة فى النقطة دى...
 معظم الادوات الباهظة الثمن موجوده فانشطة الحياة الحسية بس الحاجات دى فالاساس موجهة للمؤسسات التعليمية عشان يكون لها قدرة تحمل عالية

 بس احنا مش محتاجين كل ده...احنا هنقرا النشاط كويس و نشوف الهدف التعليمى منه و نشوف هنوصل الطفل المفهوم ده ازاى
مثال: نشاط البرج الوردى--> شوية علب باحجام متناقصة فوق بعض او كتب
مثال: صندوق الالوان-->كروت ملونة مصنوعة فالمنزل و هكذا...

فدورنا اننا نشغل مخنا و نشوف هنقدر نوصل للطفل المفاهيم دى ازاى و كل ام تشد حيلها و تبدع مع طفلها على قد ما تقدر سواء بعمل نسخ منزلية من الادوات او ابتكار وسائل بديله ان لم تستطع صناعة الاداة الاصلية و طبعا النت مليان افكار بس المهم 
انتقاء كلمات البحث بعناية

يعنى مبدئيا لو الام مش عارفة صورة النشاط او مش متخيلاه تكتب اسمه فى بحث الصور فى جوجل

طيب و لو عايزة افكار لصناعته منزليا؟؟ تكتب اسم الأداة و جنبها مثلا صناعة منزلية او اصنعها بنفسك بس بالانجليزى

مثال: DIY pink tower
homemade geometric cabinet
homemade sand paper letters

هندور على جوجل او
pintrest و ده بسميه كنز الافكار

  طيب و لو مش فاهمين اسم النشاط او الاداة؟؟ هنكتبه فى مترجم جوجل ...كده بأه ملناش حجة...فاضل بقى نبدأ الشغل :)

لازم يكون عندنا همة و نصحصح و نشغل مخنا لحد ما نوصل :)

و يبقى وضع جدول يومى هو عمل الام على حسب قدرة الطفل و المهارات التى اتقنها او لم يتقنها

النظام ده ممكن يبدا بدرى من سنتين و نص على حسب استعداد الطفل

طبعا صعب جدا انى اشرح كل الانشطة دى اولا لانها كتييييرة جدا و ثانيا انى هكون فقط بترجم المكتوب مش بضيف معلومات جديدة

ثالث مصطلح هنتكلم عنه هو:
3-Unit studies
ده اسلوب او فلسفة تعليمية بتقوم على اختيار عنوان كبير محبب للطفل زى السيارات مثلا و محاولة جعل كل الانشطة التعليمية بتدور حول العنوان ده
الفلسفة التعليمية دى ممكن تطبيقها فى اى نظام تعليمى سواء منتسورى او غيره و هى مستخدمة بكثرة فى مناهج رياض الاطفال

هناك بعض المواقع بها افكار جميلة جدا لتطبيق نظام الوحدات او (unit studies)
و دمجها مع مبادئ منتسورى و امثلة عليها:

اللينكات دى على موقع Pintrest
و هو موقع رائع بمعنى الكلمة 

و بالنسبة للمطبوعات الخاصة بمنتسورى ففى موقع
The helpful garden

و ده فقط مثال و لو عايزين اكتر هندور على جوجل عن طريق كتابة :
free montessori printables

 اضافة كمان...فى موقع رائع به منهج يومى لمنتسورى  لمدة اكثر من 40 اسبوع 
و هنا المعلمة صاحبة الموقع حاطة زى موضوع جديد  كل يوم مبنى على الانشطة الثقافية الخاصة بمنتسورى و جعل كل الانشطة الخاصة باليوم تدور حوله
الموقع هو
Just Montessori

و عايزة أضيف نقطة ان طريقة تعليم اللغة فى نظام منتسورى يمكن استخدامها فى اللغة العربية مع الاستعانة بنور البيان او منة الرحمن مثلا لان طبعا فى فروقات بين اللغتين

 حابة برده اضيف 3 مدونات  بالعربى لطريقة منتسورى هم
1-منتسورى بالمنزل
2-عالم منتسورى
3-نبتة حسنة

انا فالتدوينة دى حاولت على قد ما اقدر اننا نتعلم ازاى نجيب مصادر لشغلنا عشان نشتغل على اساس واضح من غير ما نتوه و مش هدفى ابدا شرح طريقة منتسورى لانى مجرد باحثة و مهتمة بهذه الطريقة و لست متخصصة

التدوينة الجاية إن شاء الله هكتب البديل للى مش حابب يمشى على طريقة منتسورى او حاسسها صعبة و هتحتاج منه مجهود...


تحديث: كتبت التدوينة دى بعدها بسنة تقريبا و زودت فيها خبرتى فى المونتيسورى و التعلم الذاتى ليه....ارجو تقرأوها :)

التدوينة الجديدة

دمتم سالمين :)

ازاى نبدأ تعليم منزلى ؟ 6 (ينفع اعلمه بطريقة منتسورى فالبيت ؟؟)

#نبدأ_تعليم_منزلى_ازاى_؟

(الحلقة السادسة)

بسم الله الرحمن الرحيم

هنناقش المرة دى تانى نقطتين فخطتنا 

المجال الرياضى او الحركى و دى فيها اختيارات كتيرة بداية من اللعب الحر فى الاماكن المفتوحة او الاشتراك فى رياضة او التمارين الرياضية البسيطة و دى حاجة بترجع لظروف كل اسرة...

تانى حاجة المجال الاكاديمى و ده شرحه هيطول شوية و ده اللى هيحتاج مننا اكبر  مجهود من حيث التنظيم و التخطيط

مبدايا هنقسم المرحلة اللى بنتكلم عنها لمرحلتين...مرحلة اول 3 سنوات و المرحلة من 3 ل 6 سنوات....ليه هنعرف دلوقتى..

فى طرق و فلسفات تعليمية كتير  زى مونتسورى و والدروف و ريجيو اميليا و غيرهم كتير بس انا هتكلم عن طريقة المنتسورى لعدة اسباب:
-ليها مصادر كتير جدا
-طريقة منظمة جدا و طرق تطبيقها متوفرة جدا عالنت سواء مواقع او فيديوهات
-بتبدأ من الولادة

اولا : للتعرف على طريقة منتسورى بصورة مبسطة عندنا مدونة عالم منتسورى لدعاء مجدى جزاها الله خيرا شارحة الفكرة بطريقة مختصرة و دى الروابط:
1
2
ثانيا: اللى حابب يفهم الفلسفة بتاعت الطريقة دى اكتر انصح بكتاب How to raise an amazing child..انا  قرأت منه بعض الصفحات فقط ...الكتاب كبير مش صغير لكن ميزته انه مليان صور كتير يمكن اكتر من نصه فمش ممل فالقراية و لغته سهلة و بسيطة
و ده رابط التحميل:
و فى كمان الكتاب ده جميل جدا عن المنتسورى اول 3 سنوات على نفس الموقع

Montessori for infant and toddler

ثالثا: كيفية التطبيق:
اقسام المنتسورى هى كالتالى:
1-الحياة العملية
2-الحياة الحسية
3-اللغة
4-الحساب
5-الانشطة الثقافية
6-الانشطة الفنية

1-Practical life
2-Sensory life
3-Language
4-Math
5-Cultural work
6-Art

ليه كتبتهم بالانجليزى؟؟ لسهولة البحث لان طبعا غالبية المصادر بالانجليزى

طيب فالمرحلة الاولى هنعمل ايه؟؟
انا ملقتش نظام او منهج واضح فاول فترة بس فى مبادىء عامة:
-معظم الشغل يعتبر مقدمة او تحضير للمرحلة الى بعدها بالذات فى الانشطة الحسية و اللغة الشفهية و الحياة العملية و تعزيز استقلالية الطفل
-مش شرط ابدا نستخدم ادوات بعينها...لو توفرت اكيد حاجة كويسة لكن لو فى اداة غير متوفرة احاول اوصل الهدف منها باى وسيلة تانية مناسبة و متوفرة عندى
-طيب هل ممكن نحط جدول انشطة تعليمية للمرحلة دى؟؟ اكيد...هنكتب ليستة بالمجالات دى و نبدا ندور على مصادر لنقطة نقطة عن طريق البحث بالعمر و المجال و  نعمل بيها جدول
-مثال :sensory activities for infants_ fine motor activities for toddlers
-ملحوظة: infant (0-1)
toddler (1-3)
-طيب هل فى امثلة للمصادر دى؟؟
-اكيد...ده مثال للمصادر 
و هنا الموضوع مفتوح و فيه مرونة لانه بيعتمد على قدرات الطفل و مدى استجابته و مراحل تطورة و دى متوفرة فى فى دليل انشطة الطفل
 و هو متوفر فى الرابط اللى فوق و طبعا تقدرو تدورو فى كل واحد من المجالات دى على جوجل و ممكن برده الاستعانة ببرنامج بورتاج و هو متوافر على الرابط ده:

انا كلامى خلص بالنسبة للمرحلة دى و طبعا دى مش كل المصادر لانى فقط بكتب عناوين للمجالات مع ذكر امثلة للمصادر و كلمات تساعد فى البحث و معظم المجهود عليكو طبعا 

المرحلة من 3 ل 6 هبدأها الحلقة الجاية ن شاء الله لانها فيها تفصيل....

دمتم سالمين :)

ازاى نبدأ تعليم منزلى ؟ 5 (ازاى احط خطة تعليمية و تربوية ؟؟)

#نبدأ_تعليم_منزلى_ازاى_؟

(الحلقة الخامسة)

بسم الله الرحمن الرحيم

فى الحلقات اللى فاتت اتكلمنا عن خطوات التحضير للتعليم المنزلى و انا قصدت احط مصادر قليلة جدا لكل نقطة و ساعات بحط مصدر واحد بس منعا للتشتيت و الاحباط و طبعا اللى عايزة تبحث اكتر فى نقطة او شايفة ان فى حاجات كمان مهمة المفروض تتعلمها او تعرف عنها تشد حيلها و تنطلق طبعا و تقولنا ناوية على ايه عشان احنا كمان نستفاد

النقط اللى اتكلمنا عنها فالتحضير باختصار هى:
-الاحتياجات النفسية و التربية الايجابية للطفل
-انماط التعلم للام و الطفل
-الذكاءات المتعددة
-مراحل تطور الطفل
-انماط الشخصية للام و الطفل
-مستوى اعلى من التحضير و يشمل:
       -حضور كورسات عن التعليم و التربية و الطفولة المبكرة و الصحة النفسية للطفل
       -قراءة كتب تربوية
       -قراءة كتب عن التعليم المنزلى
       -قراءة التجارب الناجحة سواء اجنبية او عربية عن التعليم المنزلى

طب ايه الخطوة اللى جاية؟؟؟
زى ما وعدتكو هنتكلم عن وضع خطة تربوية و تعليمية للطفل فى هذه المرحلة (0 ل 6 سنوات)

هنبدأ من الخطوط العريضة و بعدين واحدة واحدة ندخل فى التفاصيل...

اولا : اسال نفسى ايه المجالات اللى هعلمها لابنى فى المرحلة دى؟؟

اجابتى هتكون مثال و هنكمل شرح حسب المثال ده و المجالات دى تخضع لتقدير الام فى المقام الاول

مثال للمجالات المطلوب تعليمها للطفل:
  1-المجال الدينى
  2-المجال السلوكى و الاجتماعى
  3-المجال الحركى او الرياضى
  4-المجال الاكاديمى

نيجى لاول مجالين: المصادر كتييييييييييييييير جدا ...طيب نعمل ايه...عندى اقتراح لطيف هيظبطلنا جزء كبير جدا من النقطة دى...ايه هو؟؟
  (منهج نماء لبناء الشخصية المسلمة)

طيب و ده هنعمل بيه ايه؟؟
الكتاب ده رائع بخصوص اول مجالين...طب هنستفاد منه ازاى؟؟
الكتاب حاطط جدول لكل مرحلة عمرية فيه المجالات الاتية:
1-الايمانى
2-السلوكى و الاخلاقى
3-العقلى
4-الدعوى
5-العقلى
6-الفكرى و المنهجى
7-النفسى و ادارة الوقت
8-الاسرى و الاجتماعى
9-اللغة و التواصل
10-التقنية و المعلومات
11-القيادى و الادارى

الكلام شكلة كبير اوى مش كده؟؟ لاء مش كده
واحدة واحدة....
-مش كل المجالات بتبدا من ميلاد الطفل
-الجدول الخاص بكل مرحلة بيوضح ايه اللى المفروض الطفل يتعلمه فى كل مجال من دول و انشطة مقترحه للتطبيق و مصادر مقترحة
-طيب برده هنعمل ايه؟؟  هناخد نقطة نقطة و نشوف هنوصلها للطفل ازاى
مثال: فى المجال الايمانى مطلوب من الطفل يعرف دينه و ربه و رسوله....طيب ادخل النقطة دى لحيز التطبيق ازاى؟؟ عن طريق نشيد..حكاية ...كتب فيها منهج اسلامى للروضة....اى طريقة تشوفوها مناسبة

نرجع تانى للصورة الكبيرة....احنا عايزين نغطى اول مجالين فالخطة بتاعتنا...هنكتب المجالات دى و نحاول نحطها فى جدول زمنى داخل الخطة بتاعتنا و اخر جزء فالكتاب شارح كيفية الاستفادة من المنهج

اكيد حسيتو ان الموضوع كبير مش كده؟؟ انا مش هضحك عليكو هو فعلا كبير و عايز مجهود و على قد ما تتعبى اوى على قد ما هتلاقى نتيجة تقر عينك إن شاء الله ...

هدفك هو تنشئة كاملة لشخصية مسلمة تنفع دينها و تكون سبب لدخولك الجنة إن شاء الله...

البوست الجاى هنكمل باقى المجالات بإذن الله...

دمتم سالمين :)

ازاى نبدأ تعليم منزلى ؟ 4 ( أجهز نفسى ازاى ؟؟)

#نبدأ_تعليم_منزلى_ازاى_؟
(الحلقة الرابعة)
بسم الله الرحمن الرحيم
دلوقتى احنا بنحاول نجهز نفسنا للتعليم المنزلى...اللى انا قلته دى حاجات مبسطة يعنى بمعنى تانى(level one)
اللى عايزة تاخد خطوة اعلى لتطوير نفسها يعنى (level two) ممكن تعمل الاتى:
1-حضور كورسات اون لاين زى:
(Early chilhood education (www.open2study.com-
و ده هيبدا 16 مارس ان شاء الله فياريت تتابعوه هيفيدكم جدا
-الصحة النفسية للطفل على موقع (www.edraak.org)
و ده للاسف مش فاتح دلوقتى
-علم بثقة على نفس الموقع و ده شغال دلوقتى
-تعلم كيف تتعلم على موقع رواق هيبدأ 22 مارس إن شاء الله
2-قراءة تجارب عن التعليم المنزلى سواء عربية او اجنبية
3- قراءة كتب عن التعليم المنزلى و طبعا هتكون اجنبية لان مفيش عربى و دى موجود منها تجميعة حلوة جدا على مدونة مكعبات 
http://moka3abat-amirasa3d.blogspot.com/2015/02/homeschooling-books.html
4-قراءة كتب عن التربية و برده فى تجميعة حلوة جدا على مدونة مكعبات
http://moka3abat-amirasa3d.blogspot.com/2015/01/blog-post_7.html
و طبعا دى امثلة على اللى ممكن يتعمل و باب الاجتهاد مفتوح....
البوست الجاى إن شاء الله هيكون عن كيفية وضع خطة تعليمية و تربوية للاطفال فى سن من 0 ل 6
دمتم سالمين :)

ازاى نبدأ تعليم منزلى ؟ 3 (ازاى اتعرف على قدرات أطفالى ؟؟)

#نبدأ_تعليم_منزلى_ازاى_؟
(الحلقة الثالثة)
بسم الله الرحمن الرحيم
فى الحلقة اللى فاتت اتفقنا هنبدا نسمع كورس التربية الايجابية و نخلصة وقت ما يخلص ده هيبقى موازى لباقى شغلنا
الخطوة اللى بعدها فى فهم اطفالنا بتتكون من 4 اقسام 
-نظرية الذكاءات المتعددة
-انماط التعلم
-مراحل تطور الطفل
-انماط الشخصية و علاقتها بانماط التعلم
كلام شكلة كبير مش كده؟؟
طيب واحدة واحدة...فى مصادر كبيرة و معقده للحاجات دى....مالناش دعوة بيها دلوقتى....احنا عايزين المام بسيط بالحاجات دى و لو عايزين نتوسع بعد كده مافيش مشكلة
هكتب مصدر واحد لكل نقطة و اللى عنده اقتراحات لمصادر تانية مبسطة يا ريت يكتبها تحت البوست
1-نظرية الذكاءات المتعددة:
2-أنماط التعلم:

3-مراحل تطور الطفل:
و فى مصادر كتير جدا عالنت بتغطى النقطة دى
و ده مثال ليها
هنا

4-انماط الشخصية و علاقتها بانماط التعلم:
شرح الجزء ده موجود فالكتاب ده للى حابب يستزيد
Absolute beginners guide to homeschooling
(من مدونة مكعبات)

مش مطلوب مننا نعرف كل ده دلوقتى حالا....دى خطوات تحضيرية للتعليم المنزلى هتمشى بالتوازى مع التعليم نفسة بس عالاقل نقرا المصادر المبسطة دى كبداية
....
دمتم سالمين :)