السلام عليكم
وعدتكم انى هحاول احط بديل للى مش عايز طريقة منتسورى
للاسف انا مدورتش كتير فالجزئية دى عشان معظم قرائتى كانت على طريقة منتسورى
اللى هحاول اعمله هنا انى هساعدكم تدوروا ازاى لانى مش هدفى تجميع مصادر...انا هدفى ان كل ام يكون عندها القدرة انها تدور من غير ما تستنى حد يدورلها على مصادر
اهم حاجة كلمات البحث
بس للاسف المصادر العربية فالغالب بتبدأ من مرحلة الروضة و مرحلة ما قبل المدرسة او البلاى سكول مظلومة شوية فى المحتوى العربى
هندور على كلمات زى :
1-الاهداف التعليمية لمرحلة الروضة /رياض الاطفال
2-تخطيط وحدات الروضة
3-Preschool learning objectives
4-kindergarten learning objectives
5-kindergarten readiness check list
6-Planning preschool curriculum
7-Planning kindergarten curriculum
8-Planning preschool lessons
9-Planning kindergarten lessons
10-Preschool unit studies
11-Kindergarten unit studies
12-Free preschool curriculum
13-Free kindergarten curriculum
و ابدا تخطيط المنهج على اساس المواد اللى هندرسها ثم البحث عن مصادر لها ثم وضعا وفق خطة زمنية ثم تخطيط الدروس بصورة تفصيلية و اعتقد ممكن هنا الاستعانة بمعلمة رياض أطفال إن أمكن ذلك
و ممكن جدا اشتغل بمنهج عادى مش منتسورى و ادخل بعض النشاطات من طريقة منتسورى على حسب امكانية التطبيق بالنسبة لى
و ده ممكن يمشى بجانب انشطة تنمية المهارات فى منهج بورتاج و ده موجود
او ندور عالمناهج اللى بتقدمها المدارس و ده حل سهل جدا
لحد هنا السلسلة خلصت بس ليا شوية خواطر حابة اكتبها:
- اوعو تقارنوا نفسكوا او اولادكم بحد لان كل مدرسة منزلية ليها طابع خاص و مختلف فحاولوا تشتغلوا على تطوير نفسكوا و اولادكوا بدل تضييع الوقت فى مقارنات و
احباطات
-ابدأوا ببطء لكن بثبات...يعنى ايه؟؟ يعنى قولى هقرأ كتاب واحد بس و هحضر كورس واحد بس و خدى الموضوع بهدوء اعصاب و واحدة واحدة عشان متزهئيش و تبيعى القضية
-دى أفكارى أنا و تصورى للنفسى اعمله و مش شرط تنفع لكل الامهات...دى فقط للاسترشاد بيها و اختاروا منها اللى يتناسب معاكم ....و مع الوقت هيكون ليكم أفكاركم و قناعاتكم و هتعرفوا مع المحاولة و البحث ايه اللى ينفع معاكم و ايه مينفعش و حتى بعد البحث و لما تبتدوا تشتغلوا مع اولادكم فعلا... افكاركم هتتغير و هتكتشفوا طرق افضل ليكم و طرق مش مناسبة و مش هتستخدموها تانى
-اوعوا تدورا على مصادر بدون هدف لان ده تضييع للوقت و الطاقة و كل اللى هتكسبوه مفضلة المتصفح هتبقى مليانة جدا و الكمبيوتر كذلك هيكون مليان ملفات كتييير فاكرين انها هتنفعنا فى يوم من الايام
-الحل انكوا تمشو حسب خطة يعنى تحددوا المجالات و الاهداف و بعدين تدورولها على مصادر مش العكس
-عادى جدا جدا جدا تنبهرى بنشاط معين و تتعبى جدا عشان تعمليه لابنك و فالاخر ميعجبهوش ...ده معناه انه يا اما معندوش استعداد له دلوقتى بسبب توقيت غلط او عدم وجود المهارة اللازمة او ممكن يكون مش مناسب لطريقته فالتعلم....الخلاصة متيأسيش لحد ما تلاقى الاسلوب الصح اللى توصليله بيه المعلومة و دى ميزة التعليم المنزلى انك بتفصلى التعليم على الطفل و قدراته مش العكس
-القراءة ثم القراءة ثم القراءة و متكسلوش تقرأوا و تحضروا كورسات و تطوروا نفسكم فى مجال التربية و تعليم الاطفال بالذات طالما نويتوا تمشوا فالسكة دى لان ده هيديكوا ثقة جامدة جدا فى نفسكم تخليكوا تكملوا عن وعى و حتى لو مكانش القرار النهائى التعليم المنزلى هتكون عندكم درجة وعى عالية جدا تخليكم قادرين على تعويض النقص فى النظام المدرسى
-المرونة مهمة جدا و مش كل الامهات عندها القدرة انها هى و ابنائها يمشوا على نظام صارم...اعرفوا قدرة ابنائكم و قدرتكم على مدى الالتزام بجدول صارم عشان ميجيلكوش احباط و خليكوا واضحين مع نفسكوا و انتوا بتحطوا خطة لولادكم عشان تكون خطة واقعية و متسببش ليكم ضغط عصبى و احباط خصوصا اننا بنتعامل مع سن صغير اوى و مش سهل التحكم فى تصرفاته
-الاستعانة بالله و تجديد النية هيديكم طاقة هائلة تقدروا تكملوا بيها المشوار الطويل ده
-قراءة تجارب التعليم المنزلى هام جدا و لكن ليس للتقليد بل للاستفادة من التجارب و التشجيع
-خلوا التعليم طول الوقت و شغلوا مخ أطفالكم و انتهزوا اى فرصة تدخلولهم فيها معلومة جديدة
-لاحظوا أطفالكم كويس عشان أول ما تلاقوا عندهم اهتمام زايد فى مجال معين او موضوع معين أمشوا معاهم فيه عشان حماسهم للحاجة دى هيزود قدرتهم على التعلم جدا و دى من طرق اختيار المواضيع فى طريقة الوحدات اللى اتكلمنا عنها الحلقة اللى فاتت (unit studies)
-اعتبروا مرحلة التعليم المبكر تجربة ليكم و لولادكم و مش لازم قرار التعليم المنزلى يكون قرار لحد المرحلة الثانوية...خلوا القرار خطوة بخطوة من غير ما تتوتروا
-متضغطوش نفسكوا زيادة بمقارنة اولادكم بزمايلهم فالمدرسة سواء علميا او اجتماعيا و كفاية عبء التعليم المنزلى نفسه عليكم
-هتقابلوا كذا نوع من الناس معارض لقرار التعليم المنزلى...يفضل و انتوا فى اول الطريق متدخلوش فى نقاش مع حد و يفضل بما ان اولادكو صغيرين فمالوش لازمة تنشروا القرار فى دايرة المعارف و الاهل و الاصدقاء لحد ما تعرفوا راسكم من رجليكم
-فى ناس هيناقشكوا بهدف التنبيه لنقطة معينة او عيب معين بطريقة موضوعية فحاولوا تاخدوا كلامهم فى الاعتبار بدون تعصب و فى الاخر طبعا الام و الاب هم اصحاب القرار مش حد تانى
-فى ناس تانية هيبقوا شايفين قراركوا تحدى واضح لاختيارهم للتعليم الخاص اللى شايفين فيه اقصى مستوى ممكن يقدموه لاولادهم و قرار التعليم المنزلى بيفكرهم ان القرار ده مش افضل حاجة بس افضل المتاح و بيفكرهم بعيوب المدارس الخاصة التعليمية و التربوية و المادية طبعا...نصيحة...متناقشوش النوع ده من الناس
-نوع كمان من الناس هتقابلوه هيكون مندفع و مسمعش عن الفكرة او بحث فيها و معندوش استعداد يسمع عنها التفصيل بس بيهاجم دون علم...متحاولوش تتناقشوا معاهم خالص برده لان كل محاولاتكم للاقناع فالغالب هتكون عشان انتوا لسة خايفين من القرار و مترددين و بتحاولوا تثبتوا للناس العكس...نصيحتى هى اثبتوا لنفسكم الاول انكم قد المهمة دى بدل ما تحاولوا تثبتوا ده للناس..وجهوا مجهودكم فى الناحية الصح
-لو عندكم أطفال رضع مع وجود أطفال فى مرحلة الروضة أو البلاى سكول ...خلوهم معاكوا و انتوا بتدرسوا للطفل الاكبر لو تقدروا...دى نصيحة قرأتها من أم علمت أبنائها منزليا و بتقول انهم بيتعلموا نص اللى المفروض يتعلموه لما يكبروا فقط عن طريق وجودهم معاكى و انتى بتذاكرى لاخواتهم الكبار
-البحث فى عيوب التعليم المنزلى قبل المميزات لتلافى الحماسة الزائدة التى تؤدى لعدم التقدير الصحيح لكل جوانب القرار و انصح بقراءة هذه التدوينة على مدونة مكعبات
انتهت السلسلة و كل ما اتمناه هو دعوات صادقة بظهر الغيب
دمتم سالمين :)
